Þjóðbúningakaffi í Hannesarholti 22. janúar

Sunnudaginn 22. janúar kl. 14 er þjóðbúningakaffi í Hannesarholti við Grundarstíg 10. Hittumst á búningum og eigum saman notalega stund í huggulegu umhverfi. Félagsmenn eru hvattir til að fjölmenna enda er hér á ferðinni kjörið tækifæri til að viðra þjóðbúninga hvaða nafni sem þeir nefnast. Þeir sem nýlokið hafa við að sauma þjóðbúning eru sérstaklega velkomnir. Samkoma með þessu sniði var haldin á síðasta ári og heppnaðist hún einstaklega vel og var því ákveðið að endurtaka leikinn.

Eftir kaffið kl. 15 býðst öllum að taka þátt í þjóðbúningasöngstund í Hljóðbergi sem er samkomu og tónleikasalur hússins. Rósa Jóhannesdóttir stýrir söngstundinni en henni til halds og traust verða ungar dætur hennar þær Iðunn Helga og Gréta Petrína.

Nauðsynlegt er að skrá þátttöku með því að senda póst á This email address is being protected from spambots. You need JavaScript enabled to view it. eða hringja í síma 5515500 í síðasta lagi fimmtudaginn 19. janúar. Sérstakt tilboð verður á kaffiveitingum í tilefni dagsins, kaffi og kökudiskur með tveimur kökusneiðum með rjóma á 1.500,- kr.

Hannesarholt er sérlega skemmtilegt umhverfi fyrir þjóðbúningakaffi.  Húsið var byggt árið 1915 fyrir Hannes Hafstein fyrsta ráðherra Íslands. Í Hannesarholti er rekin fjölbreytt menningarstarfsemi ásamt veitingarekstri en nánar má lesa um Hannesarholt á heimasíðu hússins hér.

Prjónakaffi - fimmtudaginn 5. janúar

Fyrsta prjónakaffi ársins verður fimmtudaginn 5. janúar í húsnæði Heimilisiðnaðarfélagsins í Nethyl 2e. Húsið opnar kl. 19 en kl. 20 hefst kynning á spennandi dagskrá Heimilisiðnaðarskólans á vorönn 2017, sjá má námsskrána hér.

Kennarar verða á staðnum með sýnishorn af því fjölbreytta handverki sem læra má á námskeiðum skólans. Frábært tækifæri til að sjá með eigin augum það sem í boði er.

Ljúffengar kaffiveitingar á vægu verði - velkomin!

Þjóðbúningastofan (sem staðsett er í sama húsnæði og HFÍ) verður með opið á prjónakaffinu. Þangað eru gestir velkomnir til að kynna sér þjóðbúningasaum. Jafnframt býðst að koma með eldri búninga til að fá sérfræðinga til að meta ástand þeirra, til að mynda hvort hægt sé að breyta og laga.

Jólaföndur í Árbæjarsafni

Á sunnudögum á aðventunni er boðið upp á skemmtilegt gamaldags föndur á Árbæjarsafni. Það eru félagar í Heimilsiðnaðarfélaginu sem aðstoða við föndrið sem er til að mynda gerð músastiga, flétun á jólahjörtum og skraut út filti.

Föndrið fer fram á lofti Kornhlöðuhússins kl. 13-17 sunnudagana 4., 11. og 18. desember.  Þátttaka er gestum að kostnaðarlausu en greiða þarf aðgang að safninu. Hvetjum félagsmenn til að mæta á þjóðbúningi og njóta þess fjölmarga sem í boði er á safninu þessa daga en auk föndurs er verið að spinna á baðstofuloftinu í Árbæ, steypa kerti, tálga o.fl.

Vorferð laugardaginn 7. maí

Hin rómaða vorferð Funda- og fræðslunefndar verður farin laugardaginn 7. maí 2016. Lagt verður af stað frá HFÍ í Nethyl 2e kl. 9.00 og ekið um sveitir Suðurlands. Fyrsti viðkomustaðir eru Þingvellir en fulltrúi þjóðgarðsins tekur á móti hópnum og veitir leiðsögn m.a. um Þingvallakirkju. Þaðan er haldið að Hótel Grímsborgum í Þrastarskógi þar sem snæddur er hádegisverður (sveppasúpa). Þá verður ullarsetrið í Þingborg heimsótt en þar hefur lengi farið fram öflugt starf í tengslum við ull, ullarvinnslu og handverk ýmiskonar. Þaðan verður haldið að Forsæti í Flóa og skoðuð tréskurðarsýning. Að lokum verður staldarð við í Sveitabúðinni Sóley þar sem hópurinn fær kaffi og meðlæti áður en haldið verður af stað heim á leið.

Þátttökugjald í ferðina er 9.000 kr. Innfallið er: Rúta, leiðsögn, aðgangseyrir, hádegisverður og kaffihressing. Skráning á This email address is being protected from spambots. You need JavaScript enabled to view it. eða í síma 551 500 í síðasta lagi miðvikudaginn 4. maí.

Athugið að greiða þarf fyrir ferðina fyrirfram inn á reikning (eða með reiðufé á skrifstofu) ekki seinna en miðvikudaginn 4. maí. Þetta er nauðsynlegt til að fá staðfestan þátttökfjölda vegna rútu og veitinga. Upplýsingar um bankareikning fást við skráningu.

Hlökkum til að sjá sem flesta og bendum á að félagsmönnum er velkomið að bjóða með sér gestum í ferðina.