Fréttir

Námskeiðsbæklingur haustið 2017

Dagskrá Heimilisiðnaðarskólans haustið 2017 er tilbúin. Að venju eru mörg spennandi námskeið í boði, klassísk námskeið í bland við spennandi nýjungar. Námskeiðbæklinginn má nálgast á pdf formi hér. Skráning fer fram á netfangið This email address is being protected from spambots. You need JavaScript enabled to view it. 

hfi skoliNámskeiðin eru frá einu kvöldi upp í tólf vikna námskeið. Fjölbreyttnin er mikil og ættu því allir að finna eitthvað við sitt hæfi. Af nýjungum á dagskránni má nefna origami, ofnar spiladósir, þæfð tröll, jurtasmyrsl og aðstoð við að klára flosuð verk.

Þjóðbúningarsaumur, baldýring, undirpils við þjóðbúning ásamt möttulsaumi eru á sínum stað. Fimm vikna vefnaðarnámskeið hefst í október en einnig er boðið upp á myndvefnað og spjaldvefnað. Útsaumur af ýmsu tagi er heillandi en þar býðst harðangur, refilsaumur, gamli íslenski krossaumurinn, þrívíddarsaumur og útsaumuð vöggusett. Hekl fyrir byrjendur er á vísum stað ásamt prjónatækni, myndprjóni, tvíbandavettlingum og frágangi á prjónaflíkum. Tóvinna og vattarsaumur er þjóðlegt og sígilt handverk. Orkering og knipl hefur heillað marga í gegnum tíðina. Körfuvefnaður er í algleymingi en þar er boðið upp á vínviðarkörfu eða epla/prjónakörfu auk þess sem í fyrsta sinn er boðið upp á ofnar spiladósir. Skemmtilegt er að endurvinna kaffipoka með skáfléttun. Jurtalitun og sólarlitun er spennandi hver á sinn hátt. 

Það jafnast ekkert á við að læra nýtt og spennandi handverk í góðum félagsskap. Hlökkum til að taka á móti áhugasömum handverksnemendum!