Fréttir

Þjóðbúningadagur sunnudaginn 12. mars

safnahusidÞjóðminjasafn Íslands heldur árlega þjóðbúningadag í Safnahúsinu við Hverfisgötu sunnudaginn 12. mars kl. 14 í samstarfi við Heimilisiðnaðarfélagið og Þjóðdansafélag Reykjavíkur. Þetta glæsilega hús skapar skemmtilega umgjörð um samkomu prúðbúina gesta.

Við hvetjum alla okkur félagsmenn til að nota tækifærið og klæðast þjóðbúningum sínum þennan dag og koma og sýna sig og sjá aðra. Einnig mælumst við til að þeir sem þekkja einhverja sem eiga þjóðbúninga frá öðrum þjóðlöndum hvetji þá til þátttöku.

Eins og hefð er orðin fyrir munu félagar í Þjóðdansafélagi Reykjavíkur sýna dans og bjóða viðstöddum að taka þátt. Í tilefni af 90 ára afmæli Helgu Þórarinsdóttur verður sérstök sýning á þeim búningum sem hún hefur saumað en Helga hefur verið ötull félagsmaður í báðum félögum um áratuga skeið og því gleðiefni beggja félaga að heiðra hana í tilefni stórafmælisins.

Hlökkum til að sjá sem flesta á búningi - þeir sem mæta á búningi fá frítt inn á safnið.

helga th netidHelga Áslaug Þórarinsdóttir (f.14. júlí 1927) verður 90 ára í sumar. Helga er sannkölluð Reykjavíkvíkurmær, en hún hefur búið mest allan sinn aldur í höfuðborginni. Hún lauk handavinnukennaraprófi árið 1963 og kenndi handavinnu í grunnskólum til ársins 1990. Helga starfaði með Þjóðdansafélagi Reykjavíkur í áraraðir, var bæði dansari og kennari. Hún hefur einnig lengi verið félagi í Heimilisiðnaðarfélaginu og kenndi þar til að mynda sauðskinnskógerð.

Þjóðdansarinn og handavinnukonan Helga sameinuðust í þjóðbúningagerðinni. Helga hefur gert ýmis konar íslenska þjóðbúninga, s.s. kyrtla, peysuföt, upphluti og faldbúninga. Helga hefur aldrei setið auðum höndum. Til viðbótar við þjóðbúningana og alla þá handavinnu sem tilheyrir þeim hefur hún unnið að alls kyns handverki. Hún var öflugur félagi Farfugla og ferðaðist mikið með þeim bæði innanlands og utan. Helga er víðförul og hefur ferðast til 42 landa.

Það er Þjóðdansafélaginu og Þjóðdansafélagi Reykjavíkur sönn ánægja að heiðra Helgu Áslaugu Þórarinsdóttur í tilefni af níræðis afmæli hennar á Þjóðbúningadaginn í Safnahúsinu 12. mars.

Hlökkum til að sjá sem allra flesta á búningi ... sem og alla aðra áhugasama.